Hvað um veg frá Skálanesi til Staðar á Reykjanesi?

Hefur sú hugmynd aldrei verið skoðuð hvernig kæmi út að brúa Þorskafjörð fyrir mynni hans þannig að farið yrði á brúm og uppfyllingum frá Skálanesi til Staðar á Reykjanesi?  Þar eru miklar grynningar og yrði sú leið miklu styttri sem þýðir að sjálfsögðu sparnað í vegagerð annars staðar.  Þá er komist hjá að fara gegnum Teigskóg og margur annar ávinningur fylgir þessum kosti.  Auðvitað þarf að huga að náttúru og umhverfi þarna eins og annars staðar.

Áfall fyrir íbúa á sunnanverðum Vestfjörðum

Athugasemdir

[Sigurður Jón Hreinsson, 23.10.2009 kl. 10:46]

Sæll Valdimar.

Jú það er svokölluð leið A.  Án frekari útskýringa kastaði Vegagerðin þeim möguleika út af borðinu.

Mér sýnist sú leið þó hafa einmitt marga góða kosti. Leiðin þar yfir er bæði stutt og grunn.

[Viktoría Rán Ólafsdóttir, 23.10.2009 kl. 10:57]

Leið A er ekki merkt inn á myndina sem fylgir þessari frétt.

Sú leið er frá Skalanesi þvert yfir fjörðinn og að Stað á Reykjanesi.  Vegurinn myndi styttast eitthvað en ekki þyrfti að keyra yfir þessu óhugnalegu fjallvegi (Hjallaháls og Ódjúgsháls).  Auk þess myndi þorpið á Reykhólum njóta góðs af umferðinni. 

Mér skilst að leið A hafði verið útilokuð þar sem sjávarföll myndu skerðast til Gufu-, Djúpa- og Þorskafjarðar.  Er búið að fullkanna möguleika A-leiðar og skoða lausnir samhliða þessari leið sem myndi vernda sjávarföll fjarðanna.

 Sá spyr sem ekki veit? 

[Viðar Friðgeirsson, 23.10.2009 kl. 11:51]

Er það virkilegt að Vegagerðin hafi kastað þessum möguleika út án haldbærra skýringa? Ef þetta er rétt, að hægt sé að fara þarna yfir er það óskiljanlegt. Hins vegar virðist Vegagerðin oft hafa meiri áhuga á að leggja lykkju á leið sína til þess eins, að því er virðist, að troða mönnum um tær og illindast við þá sem landið eiga sem fara þarf um.

Bendi á nýlegt dæmi í Norður-þing, svokallaða Hófaskarðsleið sem nú er steinstopp og vantar þar aðeins 2 km til að ljúka tengingu þess vegar en vegna þess að Vegagerðin kaus að leggja þar lykkju á leiðina til að troða bændum um tær og tapaði máli fyrir Hæstarétti þar, er nú vegurinn ókláraður og engum til gagns þennan veturinn því umhverfisráðherra klippti svo höfuðið af skömminni með því að setja nýtt vegastæði og það eina mögulega úr því sem komið var, á þessum stutta kafla, í umhverfismat og málið er dautt næstu mánuðina.

Næsta vor verður svo væntanlega búið að meta þetta og samþykkja þó ekki væri fyrir annað en að þetta er eina færa leiðin úr vandræðunum, ef ekki þá endar þessi vegur bara þar sem endinn er nú inni í miðju Presthólahrauni..... Punktur. Þvílíkt bull og þvílíkur skandall.

[Sigurður Jón Hreinsson, 23.10.2009 kl. 13:03]

Það er kanski rétt að halda því til haga að Vegagerðin lagði það til strax á forstigum málsins að endurbyggja núverandi leið.  Því var hinsvegar hafnað af íbúum svæðisins og samgönguráðherra.  Í framhaldi af því var þetta svæði fært undan umsjón Vegagerðarinnar á Ísafirði og undir Borgarnes-deildina.

En varðandi leið A, er það eina sem fram kemur í skýrslu Vegagerðarinnar, þar sem bornir eru saman mögulegar leiðir, að leið A er talin vera of kostnaðarsöm en ekkert gefið meira út um það.  Ég hef hinsvegar alltaf efast um þær forsendur, þar sem það hlítur að vera einhvað hagkvæmara að gera eina brú, heldur en þrjár.